الرجل الذي لاتنساه المرأة

مساء الخير عليكم
من شوية كدة قريت ميل عنوانه الرجل الذي لاتنساه المراة وبعد لما قريته بقيت متأكد ان اللي كتب الميل ده اكيد امرأة .
الميل بيقول حاجات ظريفة اوي عن الرجل الذي لاتنساه المرأة تعالوا نلقي نظرة كدة ونعلق عليه .

اول فقرة بتقول ان المراة لاتنسي الرجل الذي يكون كريم في عواطفه ويده( عواطفه دي محطوطة لحفظ ماء الوجه هو المهم يكون كريم في ايده طبعاً ) ويهبها الأمان والحنان( واخدين بالكم من يهبها دي ماهي المرأة كدة متعودة تاخد متديش ).
اللين في تعامله الرقيق في مشاعره القوي الشخصية بلا غرور الواثق
من نفسه .( طبعاً المقصود هنا انه يكون مغرور وقوي الشخصية علي الناس مش عليها )

كمان الميل بيقول الذي تشعر وهي معه برجولته وأنوثتها ( ايه ده هو البنات بتفكر في الحاجات دي وانا اللي كنت فاكرهم مؤدبين ) .

اذا تحدث تنبهر من أسلوبه وحسن حديثه ولا تمله ( طبعاً المقصود هنا انه يفضل يتغزل فيها طول الوقت ويشكر فيها وفي ادبها وفي جمالها وانه يقول ان عنده استعداد انه يشرب من مية الحنفية علشانها ومننساش هنا اننا نشكر حكومة نظيف علي انها لوثت مياه الحنفيات ووفرت علينا الذهاب للبحر او للمجاري )

الذي يدللها ويرويها عشقاً.( يعني يغسل المواعين يحضر الغداء يكوي الهدوم فيه تقنية يعكف مجموعة كبيرة من العلماء النسوة ستسمح بجعل الرجال يرضعون الصغار وهذا هو قمة التدليل ).

الذي يتقن فن النظرات تجاهها ( يعني وهو بيبصلها يحط عينه في الارض هي العين حاتعلي علي الحاجب والا ايه طبعا مش خجل لكن خضوع ).

الذي يقدر إحساسها ومشاعرها ويحن عليها وقت حزنها وألمها (هما الرجالة كدة مبيقدروش مشاكل المرأة هي يعني لما سوسو تشتري فستان زي فستانها مش تبقي كارثة بذمتكم ازاي تلبسه يعني وواحدة تانية لابساه والا لما ضفر الصبع الصغير يتكسر تعوضه ازاي يارجالة من فضلكم لو واحد فيكم مراته عجبها فستان لازم ياخدها كل يوم تتفرج عليه علشان ميقلوش اننا حارمنيهم من حاجة ) .

الذي يستمع لها ويقدر رأيها ويطلب مشاركتها ويحترم رأيها.( يعني بذمتكم الاكل اهم من انها تروح تعمل شعرها عند الكوافير .)

الذي في بعض الأمور يفضلها على نفسه.(خلاص ياحبيبتي مش حاعمل عملية الزايدة وحاجبلك الفستان اللي نفسك فيه )

الذي إذا كانت أخطائها بسيطة يسامح ويعفو عنها ..(والله ياحبيبي مكنتش حاخليه يبوسني بس المشكلة اني مبعرفش اتكلم فرنساوي سامحني بقي )

الذي يكون غيور عليها بدون تحكم أو تسلط( اه ماهو لازم يسبها تلبس براحتها وتخرج براحتها والا يبقي راجل رجعي ولازم يمشي يتعارك مع كل اللي بيبصوا عليها والا يبقي راجل بارد ياحرام دايماً الرجالة غلطانين )

الذي تشعر انه يحتاجها في كل لحظة. (لو سمحتي ممكن تديني خمسة جنيه من الفلوس اللي خادتيها من محفظتي )

الذي ترى دموعه ولا يخفيها عنها .( والله حرمت مش حاسهر علي القهوة تاني )

الحار في عواطفه الذي تشعر معه دوماً أنه لايرى غيرها ( والله ياحبيبتي مبشوفش حد غيرك ولو كنت بشوف مكونتش اتجوزتك اصلاً .)

الذي يشعرها أنها ملكت فؤاده وعقله ( من يوم ماشوفتك قاعدة معاه علي السرير وانا مش قادر استحمل انا لازم ابيع السرير ده بكرة ) .

الذي تهبه عمرها لثقتها به وتعتمد عليه. ( انا واثقة ان مفيش حمار غيرك كان حايستحمل كل ده)

مابين الاقواس تعليقي الشخصي .

تعليقات نزار نبيل